Artea ikasbide, 2016

2016ko ekainaren 14a - 2016ko irailaren 18a

Parte Hartzaileak

Artistas-LTA-2016

IKASTETXEAK

Gasteizko Santa María de Vitoria LHIko 2. mailako 25 ikasle
Tutorea: Paloma Meana.
Artista: Naia del Castillo

Proiektu honen parte izango ginela jakin nuenean emozioa sentitu nuen, baina beldur nintzen ere bai; eta urduri nengoen, artista bat ezagutuko nuen eta. Museora joan ginenean metalezko armiarma bat eta lorezko txakur bat ikusi genituen, baita Alex Katzen margolanak eta pelikula ere; pelikula bikaina izan zen.

Santa María de Vitoria ikastetxeko ikasle bat

Ikastetxean denbora landu dugu. Oso dibertigarria izan da eta hori izan da onena. Mandarina azalez egindako panpinak gustatu zitzaizkidan, azalak lehortu ahala eraldatu baitziren. Oihalen gainean oinatzak uztea oso dibertigarria izan zen, baita gure bihotza entzutea; oso arraroa izan zen taupadak asko entzuten zirelako. Orain nire taupadez egindako buztinezko bihotz bat daukat. [...] Gauza asko egin ditugu, bideo bat, hirurogei aleko lepoko bat minutu bat irudikatzeko, gure etorkizunaren silueta batzuk, loreak, kimuak, buztinezko haziak, erloju erraldoi bat... Oso ongi pasatu dut. Santa María de Vitoria ikastetxeko ikasle bat

Santa María de Vitoria ikastetxeko ikasle bat

Gasteizko Padre Orbiso LHIko 5. mailako 21 ikasle
Tutorea: Begoña Martínez.
Artista: Manu Muniategiandikoetxea

Sestaoko Vista Alegre LHIko 3., 4., 5. eta 6. mailako 24 ikasle
Tutoreak: Idurre Bedialauneta eta Pilar Gómez
Artista: Elssie Ansareo

Portugaleteko Virgen de la Guía LHIko 3., 4., 5. eta 6. mailako 17 ikasle
Tutoreak: Marta Artetxe, Aitziber Milikua eta Eusko Basterretxea
Artista: Ainhoa Ortells

Bilboko Uribarri LHIko 3. mailako 18 ikasle
Tutorea: Saioa Cañas Olaskoa
Artista: Jorge Rubio

Irungo Leka Enea-Anaka LHIko 2. mailako 14 ikasle
Tutorea: Begoña Alkalde
Artista: Maider López

Artea ikasbideren bidez, unibertsoa gaia landu dugu, eguzki sistema, gehien bat. Gaiaren zailtasuna dela eta aukeratu nuen . Ikasleek modu ezberdin batean landu dute gaia, testu liburua eta eguneroko dinamika alde batera utzita. Beste perspektiba batetik landu dituzte gaiaren inguruko kontzeptuak, dinamika manipulatiboa eta praktikoa izanda. Horrela, ulertzeko zailak diren kontzeptuak eta terminoak ikasi dituzte. Gaiaren inguruan ikasleen interesa piztea eta  motibatuta egotea lortu da. Nabarmenduko nuke: ikasle guztien parte hartzea —irakurketa idazketan zailtasunak dituzten ikasleak eroso sentitu dira modu honetan lan egiten—; interesa azaldu dute, ikasi dute eta ondo pasa dute.

Begoña Alkalde, Irungo Leka Enea-Anaka LHIko irakaslea

Zeruari begiratu diogu. Ilargia, hodeiak, eguzkia, izarrak, euria, ekaitza, tximistak, argia, airea, txingorra, elurra eta lainoa ikusi ditugu, baita eguna eta gaua. Eta ilunabarra eta egunsentia. Kolore eta forma ezberdinekin margotu ditugu. Neuk, Arantxak, marroiz marraztu ditut; Danyk urdinez eta grisez; eta Dimitrik urdinez eta zuriz. Niri asko gustatu zait, batez ere planetak egiteak. Danyri asko gustatu zaio Maiderren lana ikustera autobusez joatea; eta Dimitriri euria egitea.

Irungo Leka Enea-Anaka 2. mailako ikasle bat

 

Ikusi beste urte batzuk

ARTISTAK

Elssie Ansareo

Beste arte-diziplinekin alderatuta, beharbada, ikus-entzunezkoek eskatzen dute pertsona askoz gehiagoren partaidetza artelana ekoizteko: talde-lana da eta ekarpen bakoitza berebizikoa da lana ontzeko. Horrek taldeko kide bakoitzaren ezaugarri onenak eta gaitasun handienak agerian ipintzen ditu. Komuneko helburu bat lortzeko egiten dute lan: bideoklip bat, fikziozko film labur bat, dokumental bat, bideoartea edo beste edozein euskarri ekoizteko. Prozesu horretan ohartzen zara, atsegin handiz, edozein adinekoek ikasten dugula eta posible dela ikus-entzunezko bat ekoizteak dakarren partekatutako bizipenaz gozatzea.

Naia del Castillo

Argazkilaritza, performance ekintzak, idazmena eta eskultura iragankorrak landu dituzte aurten ikasleek, denboraren kontzeptua jorratzeko: hain zuzen, denboraren inguruko jakintza arrazoitua eskuratzeko eta denboraren eragina ezagutzeko. Horretarako hainbat esperimentu egin, behatu eta gaia bera kontzeptualizatu dute. Laburbilduz, gauza asko egin ditugu aurten, “artea ikasbide” izanda oso ondo pasatu dute eta guztiz hunkitu dira ikasleak

Maider López

Planetak, haien mugimenduak eta egunean, gauean eta urtaroetan duten eragina landu ditugu. Zeruari begiratu genion, ikusitakoaz hitz egin genuen eta ikusi ez genuena imajinatu genuen. Planeten orbita, mugimenduak eta haien arteko harremana ikasteko, hori guztia irudikatu eta antzeztea erabaki genuen. Horretarako koloreaz baliatu ginen eta zehatzetik orokorrera eta ikasitakotik asmatutakora joan ginen. Planetak margotu ondoren, pintutako kartoiekin bildu ginen eta errotazio eta translazio mugimenduak antzeztu genituen, planetak bagina moduan. Lurra hezurmamitzen zuen haurra Eguzkira gehiegi hurbiltzen bazen, ikaskideek deiadar egiten zioten: “Kiskaliko zara!”. Egun batean ikaskide batek oso serio esan zion beste bati, ardura hartzen ari ez zen bati: “Saturno bazara, Saturno zara; ezin zara denbora guztian planetaz aldatzen ibili”.

Manu Muniategiandikoetxea

Erakusketa baterako artea egiteak artearekin harremanetan jartzen ditu haurrak eta egiten dutenaz jabetzen dira, helburu bat baitu lanak eta mundu errealean gauzatze/ondorio bat ere bai. Lana baldintzatzen dute proiektuan dauden pertsonek eta inguruko egoerak. Ikasleek aldi labaina bizi dute eta edozein aldaketak elkarrekin lanean ematen dugun denbora honetan eragina du. Testuinguruak baldintzatutako egoera pertsonalak lanean eta proiektuaren garapenean eragina dute.

Egin dugun lanaren bidez pertsonak artearekin harremanetan jartzen lagundu dugu, eta, azken batean, artearen bidez errealitatearekin jar daitezke harremanetan. Prozesu hori ezin daiteke neurtu, ez da gaitegi batean aurrera joatea modukoa; menditik ibiltzea bezalakoa da, mendia ulertzen saiatzen gara ibili bitartean. Guztiok elkarrekin bat gara, azken finean. Esperientzia horrek garrantzi handia du ikasleen adimenaren garapenean eta kritika-zentzua eratzean, eta hazi bitartean oso erabilgarria izango zaie. Lan egitean arduratsu izaten behar direla ohartu dira; aztarna utziko die eta etekina aterako diote.

Jorge Rubio

Norbaitek zerbait galdetuz gero baino ez duzu erantzuten. Estimulu nahiko nabarmenek baino ez dituzte pizten erantzun-mekanismoak eta horiek mugimendua; modu, norabide, noranzkoa eta indar egokia duen mugimendua. Benetan, erraza da: erreflexu bat ere izan liteke... Horixe erakusten saiatzen gara programa honetan.

Aurten, ikastetxean, antzekotasunak bilatu, formak landu, koloreak nahastu, egurrak moztu, lerroak marraztu, orbanak ezabatu, masak ahokatu, planoak margotu ditugu, hainbat estetika aztertu ditugu, ideiak saiatu ditugu... Eta hori guzti hori, ia nahi gabe.

Pena da amaitzea, baina uste dut Bilboko Uribarri ikastetxeko haurrek erakusketa hau baino zerbait gehiago lortu dutela: badakite BEREZKO artea dutela eta horretara jo dezaketela gauzak bestela ikusteko.

Ainhoa Ortells

Aurten adin askotako ikasleak edukitzeak askotariko proposamen ez-ustekoak izatea ekarri du, eta horrek lana handitu du: zer egin, zertan pentsatu; ia guztia bat-batean egin dugu, senez, barrukoari bakarrik begiratuz. Dimentsio oso interesgarria hartu du proiektuak horrela, artea dela kontuan izanik. Aurten denetarik egin dugu: kalkatzen ikasi dugu, “moztu eta itsasten”, hainbat materialez koloreztatzen; gogoratu dugu mundua zoragarria dela marratik kanpo margotzen uzten dizutenean, beldurrik gabe zirriborroak egiten dituzunean, eskuaren aztarna paper zurian uzten duzunean eta are ilusioz oihuka egiten dugunean edo Eskeletoaren inguruko rap bat idazten dugunean.

 

Ikusi beste urte batzuk

Babeslea

Orri honek cookieak erabiltzen ditu nabigazioa eraginkorragoa izan dadin eta zerbitzu pertsonalizatuagoa izan dezazun. Nabigazioarekin jarraituz gero, cookien erabilera onartzen duzula ulertuko dugu. Konfigurazioa aldatu edo informazio gehiago eskura dezakezu gure Cookien Politika bidez.